Mbledhja vjetore e Kuvendit të Anëtarëve të STIKK-ut diskuton të arriturat dhe ndryshimet e propozuara
Prishtinë, 31 mars 2023 – Më 28 mars u mbajt mbledhja vjetore e Kuvendit të Anëtarëve të STIKK-ut, ku Shoqata e Teknologjisë së Informacionit dhe Komunikimit të Kosovës (STIKK) prezantoi të arriturat për vitin 2022 dhe planet e saj për vitin 2023. Ky takim u mbajt në një vit jubilar, pasi STIKK feston 15 vjetorin e themelimit, duke demonstruar rolin kryesor që ka luajtur shoqata në zhvillimin sektorit TIK të Kosovës.
Kuvendi diskutoi ndryshimet e propozuara nga Bordi në mënyrën se si funksionon STIKK, si në aspektin operativ ashtu edhe në aspektin statutor. Edhe pse disa nga këto ndryshime nuk morën miratimin e Kuvendit, STIKK vlerëson kontributin dhe njohuritë e vlefshme që u ndanë gjatë këtyre diskutimeve.
Shoqata shpreh keqardhjen për dorëheqjet e z. Armend Malazogu dhe znj. Hana Qerimi nga Bordi i Drejtorëve të STIKK, dhe vlerëson kontributin e tyre. STIKK i uron suksese në përpjekjet e tyre të ardhshme.
Po ashtu, Kryetari i Bordit, z. Valon Canhasi, ka vendosur që të mos rikandidojë për një mandat tjetër në bordin e STIKK-ut. Shoqata shpreh mirënjohjen e saj për shërbimin dhe udhëheqjen e z. Canhasi gjatë mandatit të tij në Bord.
Në axhendën e takimit ishte miratimi i planit të punës së STIKK-ut për vitin 2023 dhe zgjedhja e anëtarëve të rinj të Bordit. Mirëpo, mbledhja nuk u përfundua për shkak të mungesës së kuorumit pas largimit të disa anëtarëve të Bordit. STIKK shpreh keqardhje që nuk ka mundur t’i përmbyllë këto pika të rëndësishme gjatë Kuvendit dhe i siguron anëtarët se ato do të trajtohen në mbledhjen e radhës të jashtëzakonshme të Kuvendit të STIKK-ut, e cila do të mbahet brenda 30 ditëve të ardhshme.
STIKK është mirënjohës për kontributin dhe bashkëpunimin e çmuar të të gjithë anëtarëve tanë dhe për mbështetjen e vazhdueshme të sektorit të TIK-ut në Kosovë. Ne jemi të përkushtuar për rritjen e sektorit dhe presim me padurim adresimin e ndryshimeve të propozuara dhe zgjedhjen e anëtarëve të rinj të Bordit në mbledhjen e ardhshme.
